ඉන්දියාවේ WhatsApp ගිණුම් ලක්ෂ 98ක් තහනම්

2025 ජූනි මාසයේදී WhatsApp සමාගම ඉන්දියාවේ ගිණුම් ලක්ෂ 98කට අධික ප්‍රමාණයක් තහනම් කර ඇති බව විදෙස් මාධ්‍ය වාර්තා කරයි. මෙම තහනම් කිරීම් WhatsApp සමාගමේ අනිසි භාවිතය හා හානිකර හැසිරීම් වලක්වා ගැනීම සඳහා ගන්නා පියවරවල කොටසකි. තහනම් කරන ලද ගිණුම් ලක්ෂ 98ක් අතරින් ලක්ෂ 19.79ක් පමණ ගිණුම් පරිශීලකයින්ගේ පැමිණිලි ලැබීමට පෙරම තහනම් කර ඇත. WhatsApp සමාගම පවසා ඇත්තේ හානිකර ක්‍රියාකාරකම් ආරම්භ වීමට පෙරම වැළකීම ඔවුන්ගේ ප්‍රමුඛතාවය බවයි. ජූනි මාසයේදී WhatsApp සමාගමට ගිණුම් තහනම් කිරීම් සම්බන්ධව අභියාචනා 16,069ක් ලැබී ඇති අතර, ඒවායින් ගිණුම් 756ක් සම්බන්ධයෙන් නැවත සොයා බැලීමේ ප්‍රතිඵලයක් ලෙස තහනම් ඉවත් කිරීම වැනි පියවර ගෙන ඇත. එම මාසයේදී සමාගමට ලැබුණු සමස්ත පරිශීලක පැමිණිලි සංඛ්‍යාව 23,596ක් වන අතර, ඒවායින් ගිණුම් 1,001ක් සම්බන්ධයෙන් විමර්ශණය කර ක්‍රියාමාර්ග ගෙන ඇත. මෙම ක්‍රියාමාර්ග WhatsApp විසින් ගෙන ඇත්තේ ඔවුන්ගේ සේවාව භාවිතා කරන පරිශීලකයින්ගේ ආරක්ෂාව සහ පෞද්ගලිකත්වය ආරක්ෂා කර ගැනීම සඳහාය. තහනම් කිරීම් වලට හේතු වන්නේ අනවසර තැපැල් (spam), වංචා, අනවශ්‍ය තොරතුරු පැතිරවීම සහ වෙනත් අනිසි භාවිතයන් වැනි ක්‍රියාකාරකම් බව WhatsApp පෙන්වා දී ඇත. මෙම පියවර ඔස්සේ සමාගම තම සේවාවේ විශ්වාසනීයත්වය රැක ගැනීමට උත්සාහ කරන බව පැහැදිලි වේ.