ලොව පුරා අක්‍රිය වූ ඇමසන් යථා තත්ත්වයට
ඇමසන් සමාගමේ වෙබ් සේවාවන්හි ඊයේ (20) සිදුවූ විශාල තාක්ෂණික දෝෂයක් හේතුවෙන් ලොව පුරා ජනප්‍රිය වෙබ් අඩවි සහ යෙදුම් දහස් ගණනක් ක්‍රියා විරහිත වූ අතර, මිලියන ගණනක පාරිභෝගිකයින් බරපතල අපහසුතාවයකට පත් විය. මෙම අඛණ්ඩ සේවා බාධාව ඇමසන් සමාගම විසින් අද (21) දින එළිදක්වන ලද නිවේදනයකින් තහවුරු කරන ලදී. සමාගම පවසා සිටින්නේ බොහෝ සේවාවන් දැනට සාමාන්‍ය තත්ත්වයට පත්ව ඇති අතර, ඉතිරි සේවා ඉක්මනින්ම ප්‍රතිස්ථාපනය කිරීම සඳහා තාක්ෂණික කණ්ඩායම් කටයුතු කරමින් සිටින බවයි. මෙම විශාල සේවා බාධාවෙන් පීඩාවට පත් වූ ජනප්‍රිය සේවා අතර ස්නැප්චැට්, සූම්, රෙඩිට් සහ ප්‍රයිම් වීඩියෝ වැනි වෙබ් අඩවි හා යෙදුම් ඇතුළත් විය. එපමණක් නොව, ලොයිඩ් සහ හලිපැක්ස් වැනි බැංකු සේවා ද මෙම දෝෂයෙන් බලපෑමට ලක් වූ බව වාර්තා විය. මෙම සිදුවීම නිසා ලොව පුරා මිලියන ගණනක පාරිභෝගිකයින්ට අදාළ සේවා භාවිතයේදී බරපතල අපහසුතා ඇති විය. මෙහි බලපෑමේ විශාලත්වය මනිවා ඇත්තේ ඇමසන් සමාගමට පමණක් ලැබුණු පැමිණිලි ලක්ෂ හයකට ආසන්න සංඛ්‍යාවකිනි. තොරතුරු තාක්ෂණ විශේෂඥයන් මෙම සිදුවීම පිළිබඳව ඉහළින් අවධානය යොමු කරමින් පෙන්වා දෙන්නේ, ලොව පුරා වෙබ් සේවා බහුතරයක් ඇමසන්, මයික්‍රොසොෆ්ට් සහ ගූගල් වැනි සමාගම් කිහිපයක සේවා මත රඳා පවතින බවයි. මෙම කේන්ද්‍රීකරණය හේතුවෙන්, මෙවැනි සේවා දායකයෙකුගේ පද්ධතියේ කුඩා දෝෂයක් පවා ගෝලීය වශයෙන් අති විශාල හානි සහ බලපෑම් ඇති කළ හැකිය. වර්තමානය වන විට, ඇමසන් සමාගම තම සේවාවන්හි ස්ථාවරත්වය නැවත පිහිටුවීම සඳහා කටයුතු කරමින් සිටින අතර, දෝෂයට ලක් වූ සියලුම වෙබ් සේවා ඉක්මනින් හා සම්පූර්ණයෙන්ම යථා තත්ත්වයට පත් කිරීමට ඔවුන් පොරොත්තු වන බව නිවේදනය කර ඇත.
News Sources
