රනිල්ගෙන් මස්ක්ට ස්තූතිය

හිටපු ජනාධිපති රනිල් වික්‍රමසිංහ මහතා 'Starlink' චන්ද්‍රිකා අන්තර්ජාල සේවාව ශ්‍රී ලංකාවේ සියලුම පුරවැසියන්ට ලබාදීම සම්බන්ධයෙන් එහි නිර්මාතෘ සහ ප්‍රධාන විධායක නිලධාරී ඊලොන් මස්ක්ට කෘතඥතාව පළ කර ඇත. රනිල් වික්‍රමසිංහ මහතා නිවේදනයක් නිකුත් කරමින්, ඉදිරි දිනවලදී ඊලොන් මස්ක් සමඟ හමුවීමට බලාපොරොත්තුවෙන් සිටින බවත්, එම හමුවේදී ශ්‍රී ලංකාවේ ඩිජිටල් ක්ෂේත්‍රය සඳහා ඇති අවස්ථා ගවේෂණය කිරීමට බලාපොරොත්තු වන බවත් පැවසීය. ඔවුන් දෙදෙනාගේ මුල් හමුව 2024 වසරේ ඉන්දුනීසියාවේ බාලිහිදී පැවති 10වන 'ලෝක ජල සමුළුවේදී' සිදුවිය. මෙම හමුව 'Starlink' සේවාව ශ්‍රී ලංකාවට ලබාදීමේ ක්‍රියාවලියේ ආරම්භය ලෙස සැලකේ. ලෝක ප්‍රසිද්ධ ව්‍යාපාරික ඊලොන් මස්ක් ඔහුගේ 'X' (ට්විටර්) ගිණුමේ සටහන් කරමින්, 'Starlink' අන්තර්ජාල සේවාව දැනටමත් ශ්‍රී ලංකාව තුළ ක්‍රියාත්මක වන බව ප්‍රකාශ කර ඇත. මීට පෙර, 2024 වසරේදී ශ්‍රී ලංකාවේ විදුලි සංදේශ නියාමන කොමිෂන් සභාව (TRCSL) විසින් 'Starlink' සමාගමට චන්ද්‍රිකා තාක්ෂණය භාවිතයෙන් අන්තර්ජාල සේවා සැපයීම සඳහා 'විදුලි සංදේශ සේවා සැපයුම්කරු' බලපත්‍රයක් නිකුත් කරන ලදී. 'Starlink' අන්තර්ජාල සේවාව ශ්‍රී ලංකාවේ දැනට පවතින ෆයිබර් තාක්ෂණය මත පදනම් වූ අන්තර්ජාල සේවාවලට වඩා කිහිප ගුණයකින් වේගවත් වන අතර, විශේෂයෙන් ග්‍රාමීය හා දුරස්ථ ප්‍රදේශවලට අඛණ්ඩ හා උසස් ගුණාත්මක අන්තර්ජාල සේවාවක් ලබාදීමට හැකියාව ඇත. මෙම ව්‍යාපෘතිය ශ්‍රී ලංකාවේ ඩිජිටල් යටිතල පහසුකම් වර්ධනය කිරීමට හා රටේ අන්තර්ජාල ප්‍රවේශය වැඩි දියුණු කිරීමට සැලකිය යුතු දායකත්වයක් සපයනු ඇතැයි අපේක්ෂා කෙරේ.