මහනුවරට නව යුගයක් - Virtual City එකට අනුමැතිය

මහනුවර නගරය "Virtual City in Kandy" ලෙස අතත්‍ය නගරයක් (Virtual City) නිර්මාණය කිරීමේ ව්‍යාපෘතියක් යුනෙස්කෝ ලෝක උරුමයක් වන ශ්‍රී දළදා මාළිගාව ඇතුළත්ව ආරම්භ කිරීමට තෝරාගෙන ඇත. මෙම ව්‍යාපෘතිය කොටස් දෙකකට බෙදා ක්‍රියාත්මක කිරීමට යෝජනා කර ඇත. පළමු අදියරේදී, මහනුවර නගරයේ සංචාරක ආකර්ෂණීය ස්ථාන 58ක් හඳුනාගෙන ඇති අතර, දෙවන අදියරේදී ශ්‍රී දළදා මාළිගාව සහ එයට ආසන්නව පිහිටි ඓතිහාසික හා සංචාරක වැදගත්කම් සහිත ස්ථාන 20ක් ඩිජිටල් තාක්ෂණය භාවිතයෙන් අතත්‍ය ලෝකයට නිර්මාණය කිරීමට අපේක්ෂා කෙරේ. මෙම ව්‍යාපෘතිය ක්‍රියාත්මක කිරීම සඳහා ශ්‍රී ලංකා ටෙලිකොම් ආයතනය තෝරාගෙන ඇති අතර, එය ඩිජිටල් ආර්ථික අමාත්‍යාංශය විසින් නිර්දේශ කර ඇත. ආයතනයේ තාක්ෂණික හැකියාවන්, සම්පත් සහ පසුගිය කාලයේ සාර්ථකව ක්‍රියාත්මක කළ ව්‍යාපෘති පිළිබඳ සමීක්ෂණයකින් පසුව මෙම තීරණය ගෙන ඇත. මෙම ව්‍යාපෘතිය "Clean Sri Lanka" වැඩසටහන යටතේ වෙන් කරන ලද අරමුදල් භාවිතයෙන් ක්‍රියාත්මක කිරීමට නියමිතය. විදේශ කටයුතු, විදේශ රැකියා හා සංචාරක අමාත්‍යවරයාගේ යෝජනාව අමාත්‍ය මණ්ඩලය විසින් අනුමත කර ඇති අතර, මෙහි ප්‍රධාන අරමුණ වන්නේ ශ්‍රී ලංකාවේ සංචාරක කර්මාන්තය තවදුරටත් ප්‍රවර්ධනය කිරීම සහ යුනෙස්කෝ ලෝක උරුමයක් වන ශ්‍රී දළදා මාළිගාව හා මහනුවර නගරයේ ඓතිහාසික හා සංස්කෘතික වටිනාකම ගෝලීයව ප්‍රචාරණය කිරීමයි. මෙම අතත්‍ය නගර නිර්මාණය ජාත්‍යන්තර සංචාරකයින් ආකර්ෂණය කර ගැනීමටත්, ඩිජිටල් ආර්ථිකය වර්ධනය කිරීමටත් උපකාරී වනු ඇතැයි බලාපොරොත්තු වේ.