Chrome, Google වලට බරපතළ අභියෝගයක්

OpenAI සමාගම විසින් කෘත්‍රිම බුද්ධියෙන් (AI) බලගැන්වෙන “ChatGPT Atlas” නම් නව වෙබ් බ්‍රව්සරයක් හඳුන්වා දී ඇත. මෙම බ්‍රව්සරය Google Chrome වැනි පවතින බ්‍රව්සරවලට සෘජු අභියෝගයක් එල්ල කරන අතර, එහි විශේෂත්වය නම් සාම්ප්‍රදායික ලෙස සෙවුම් පටිය (address bar) ඉවත් කිරීමයි. OpenAI හි ප්‍රධාන විධායක සෑම් ඕල්ට්මන් පවසන පරිදි, මෙය සම්පූර්ණයෙන්ම ChatGPT වටා ගොඩනගා ඇති බවයි. මෙම බ්‍රව්සරය මුලිකවම Apple සමාගමේ macOS මෙහෙයුම් පද්ධතිය සඳහා නිකුත් කර ඇත. Atlas බ්‍රව්සරයේ වඩාත්ම කැපී පෙනෙන විශේෂාංගයක් නම් “Agent Mode” ය. මෙම ක්‍රියාකාරී ප්‍රකාරය හරහා, බ්‍රව්සරය පරිශීලකයා වෙනුවෙන් ස්වයංක්‍රීයව සෙවුම් කරයි. නමුත් මෙම විශේෂාංගය ලබා ගත හැක්කේ මුදල් ගෙවන ChatGPT Plus හෝ Pro ග්‍රාහකයින්ට පමණි. මෙය පරිශීලකයාගේ බ්‍රවුසින්ගත සන්දර්භය (browsing context) අවබෝධ කර ගනිමින්, වේගවත් හා වඩාත් ප්‍රයෝජනවත් ප්‍රතිඵල ලබා දෙන බව සඳහන් වේ. OpenAI සමාගම තම නිෂ්පාදන පරාසය පුළුල් කරමින් ආදායම් මාර්ග නිර්මාණය කිරීමට උත්සුක වන අතර, මෙම බ්‍රව්සරය ඒ සඳහා වන වැදගත් පියවරකි. සමාගම දැනටමත් Etsy, Shopify, Expedia, සහ Booking.com වැනි වෙබ් අඩවි සමඟ හවුල්කාරීත්වයක් ගොඩනගා ඇත. මෙමගින් පරිශීලකයන් සෘජුවම අදාළ මාර්ගගත වෙළඳසැල් හෝ සේවා වෙත හැරවිය හැකිය. ChatGPT සේවාව සතියකට පරිශීලකයින් මිලියන 800ක් භාවිතා කරන බව OpenAI නිවේදනය කර ඇත. මෙම විශාල පරිශීලක පදනම නව බ්‍රව්සරය සඳහා ස්වභාවික වෙළඳපලක් සපයයි. AI මත පදනම් වූ සෙවුම් ප්‍රවණතාව වැඩි වෙමින් පවතින අතර, එය Atlas වැනි නිෂ්පාදන සඳහා හිතකර පරිසරයක් නිර්මාණය කරයි. කෙසේ වෙතත්, විශේෂඥයින් පවසන්නේ Chrome හෝ Microsoft Edge වැනි පැරණි බ්‍රව්සරවලට තරඟ කිරීම පහසු නොවන බවයි. එසේම, Google වැනි සමාගම් දැනටමත් තම සෙවුම් යන්ත්‍රවල AI අංග ශක්තිමත් කරමින් සිටින බවත්, මෙය තීව්‍ර තරඟකාරී පසුබිමක් ඇති කරන බවත්ය.