දැඩි ආරක්ෂක රැකවල් මැද ශ්‍රී ලංකා ක්‍රිකට් පිල පුහුණුවීම් අරඹයි : දෙවැනි එක්දින තරගය අද

ශ්‍රී ලංකා ක්‍රිකට් කණ්ඩායම දැඩි ආරක්ෂක රැකවල් මැද පාකිස්ථානයේ පැවති පුහුණු සැසියකට සහභාගී වීමත් සමග, එරට සංචාරයේ දෙවන එක්දින තරගය අද (14) රාවල්පිණ්ඩි ක්‍රීඩාංගණයේ දී පැවැත්වීමට නියමිතව තිබෙනවා. පසුගියදා ඉස්ලාමාබාද් නුවර සිදු වූ ත්‍රස්ත ප්‍රහාරය හේතුවෙන් ආරක්ෂක තත්ත්වය පිළිබඳව ගැටළු මතු වීමත් සමග, ශ්‍රී ලංකා ක්‍රිකට් ක්‍රීඩකයින් කණ්ඩායමක් යළි දිවයිනට පැමිණීමට ඉල්ලීමක් කර තිබුණත්, ඉහළ මට්ටමේ සාකච්ඡා වලින් පසු ඔවුන් සියලු දෙනාම තරගවලින් ඉවත් නොවීමට තීරණය කර ඇත. මෙම තීරණයට පසුබිම් වූයේ ශ්‍රී ලංකාවේ ජනාධිපති අනුර කුමාර දිසානායක, ක්‍රිකට් පාලක මණ්ඩලයේ සභාපති සහ ආරක්ෂක ලේකම් විශ්‍රාමික එයාර් වයිස් මාර්ෂල් සම්පත් තුයියකොන්තා යන අය පාකිස්ථාන බලධාරීන් සමග පවත්වා ඇති ගැඹුරු සාකච්ඡා වේ. මෙම සාකච්ඡාවල ප්‍රතිඵලයක් ලෙස, ක්‍රීඩකයින් නවාතැන් ගන්නා හෝටලයේ සිට රාවල්පිණ්ඩි ක්‍රීඩාංගණය දක්වා වූ සමස්ත ගමන් මාර්ගයත්, ක්‍රීඩාංගණය තුළත් පිටතත් විශේෂ ආරක්ෂක රැකවල් යොදවා ඇත. පාකිස්ථාන අභ්‍යන්තර කටයුතු අමාත්‍ය මොහ්සින් නක්වි පැහැදිලි කර ඇත්තේ, ශ්‍රී ලංකා ක්‍රීඩකයින් රාජ්‍ය අමුත්තන් ලෙස සලකා ඔවුන්ගේ ආරක්ෂාව සැලසීමට එරට හමුදාව සහ පැරාමිලිටරි හමුදා යොදාගෙන ඇති බවයි. ආරක්ෂක සුදානම් පිළිබඳව සහතික වීම සඳහා පාකිස්ථාන ක්‍රිකට් ආයතනයේ සභාපතිවරයා සහ ආරක්ෂක ප්‍රධානීන් ද ඊයේ (13) රාත්‍රියේ පැවති පුහුණු සැසිය නිරීක්ෂණය කළහ. තත්ත්වය සාමාන්‍ය ගති ගුණයට පත්වීමත් සමග, ඊයේ පැවැත්වීමට නියමිතව තිබූ දෙවන එක්දින තරගය අද (14) පස්වරු 3.00ට ක්‍රීඩාංගණයේදී පැවැත්වීමට නියමිතය. තුන්වන හා අවසන් එක්දින තරගය 16 වන දිනට කල් දමා ඇත. මෙම තරගාවලියෙන් පසුව ආරම්භ වන ශ්‍රී ලංකාව, පාකිස්ථානය සහ සිම්බාබ්වේ යන කණ්ඩායම් අතර පැවතීමට නියමිත තුන්කොන් පන්දුවාර 20 තරගාවලිය ද මේ මස 18 වන දින දක්වා කල් දමා ඇත. සිම්බාබ්වේ කණ්ඩායම ඊයේ තරගාවලිය සඳහා පාකිස්ථානයට පැමිණ ඇත. මෙම තුන්කොන් තරගාවලියේ පළමු තරගය පාකිස්ථානය සහ සිම්බාබ්වේ අතර 18 වන දින රාවල්පිණ්ඩි ක්‍රීඩාංගණයේදී පැවැත්වෙන අතර, ශ්‍රී ලංකාව එහි පළමු තරගය ක්‍රීඩා කරන්නේ 20 වන දින සිම්බාබ්වේ කණ්ඩායමට එරෙහිවයි. මීට අමතරව, පාකිස්ථාන ක්‍රිකට් කණ්ඩායමට ජාත්‍යන්තර ක්‍රිකට් කවුන්සිලය විසින් ඔවුන්ගේ තරග ගාස්තුවෙන් සියයට 20ක දඩයක් පනවා ඇත. එය පළමු එක්දින තරගයේදී නියමිත කාලය තුළ පන්දුවාර සංඛ්‍යාව ක්‍රියාත්මක නොකිරීම හේතුවෙන් එල්ල කරන ලද දඩයකි. පාකිස්ථානයේ හිටපු ක්‍රීඩක ෂොයිබ් අක්තාර් ඇතුළු පිරිසක් සහ එරට ක්‍රිකට් ලෝලීන්, ශ්‍රී ලංකා කණ්ඩායම තරගවලින් ඉවත් නොවීමට ගත් තීරණයට ස්තූතිය සහ ගෞරවය පුදකරමින් සමාජ මාධ්‍ය හරහා අදහස් දක්වා ඇත.