ඉන්දු එංගලන්ත 5 වැනි ටෙස්ට් තරගයේ ජය ඉන්දියාවට; තරගාවලිය 2 - 2 ලෙස සමවෙයි

කාසියේ වාසිය දිනාගත් එංගලන්ත නායකයා පළමුවෙන් පන්දුවට පහර දීමට ඉන්දියාව ආරාධනා කළේය. ඒ අනුව ඉන්දීය කණ්ඩායම පළමු ඉනිම ආරම්භ කළ අතර, ආරම්භක පිතිකරුවන් වූයේ යෂස්වි ජයස්වාල් සහ කේ.එල්. රාහුල් ය. ජයස්වාල් ලකුණු 02ක් පමණ රැස් කරමින් පළමු කඩුල්ල ලෙස දැවී ගියේය. ඉන්දීය පළමු ඉනිම ලකුණු 224කට සීමා වූ අතර, කරුන් නායර් ලකුණු 57ක් සහ සයි සුධර්ශන් ලකුණු 38ක් රැස් කළහ. එංගලන්තය වෙනුවෙන් ගස් ඇට්කින්සන් පන්දුවාර 21.4කදී ලකුණු 33කට කඩුළු 5ක් දවා ගත්තේය. පළමු ඉනිමේ පිළිතුරු ඉනිමේදී එංගලන්තය ලකුණු 247ක් රැස් කළේ සැක් ක්‍රෝලි (ලකුණු 47) සහ හැරි බෲක් (ලකුණු 53) යන පිතිකරුවන්ගේ දායකත්වයෙන් යුතුවයි. ඉන්දියාව වෙනුවෙන් මොහොමඩ් සිරාජ් සහ ප්‍රසිද් කෘෂ්ණ කඩුළු 4ක් බැගින් දවා ගත්හ. දෙවන ඉනිමේදී ඉන්දියාව ලකුණු 396ක් රැස් කළේ යෂස්වි ජයස්වාල්ගේ විශිෂ්ට සියයක් (ලකුණු 118, හතරේ පහර 14ක් සහ හයේ පහර 2ක්), ආකාශ් ඩීප් (ලකුණු 66), රවීන්ද්‍ර ජඩේජා (ලකුණු 53) සහ වොෂින්ටන් සුන්දර් (ලකුණු 53) යන පිතිකරුවන්ගේ දායකත්වයෙනි. එංගලන්තය වෙනුවෙන් ජොෂ් ටංග් පන්දුවාර 30කදී කඩුළු 5ක් දවා ගත්තේය. එංගලන්තයේ දෙවන ඉනිම ලකුණු 361කට සීමා වූ අතර, හැරි බෲක් (ලකුණු 111), ජෝ රූට් (ලකුණු 105), සහ බෙන් ඩකට් (ලකුණු 54) යන පිතිකරුවන් විසින් වැදගත් දායකත්වයක් ලබා දුන්නේය. ජෝ රූට් ICC ලෝක ටෙස්ට් ශූරතා ඉතිහාසයේ ලකුණු 6,000 සීමාව පසුකළ පළමු පිතිකරුවා බවට පත් විය. තරගාවලිය 2-2 ලෙස සම වී අවසන් විය.