ජාත්‍යන්තරයට ලංකාවේ නම අරන් ගිය ඇය යළි දිවයිනට

එක්සත් ජාතීන්ගේ සංවිධානයට අනුබද්ධ ලෝක බුද්ධිමය දේපළ සංවිධානය (WIPO) විසින් පිරිනැමෙන 2025 "ලෝක බුද්ධිමය දේපළ ගෝලීය සම්මාන" උළෙලේ (WIPO Global Awards 2025) “පාරිසරික අංශය” වෙනුවෙන් වන සම්මානය දිනාගත් ආචාර්ය නදීශා චන්ද්‍රසේන මහත්මිය ඊයේ (19) රාත්‍රියේදී ශ්‍රී ලංකාවට පැමිණ ඇත. ඇය මෙම සම්මානය දිනාගත්තේ නගර ආශ්‍රිත විවෘත කාණු තුළ ප්ලාස්ටික් හා පොලිතින් සිරවීම නිසා ජල ගැලීම් ඇතිවීම වැළැක්වීමට ඇය සොයාගත් නව්‍ය විසඳුම් හේතුවෙනි. මෙම ගවේෂණය මඟින් නගර සංවර්ධනය හා පාරිසරික ගැටලු විසඳීමට සැලකිය යුතු දායකත්වයක් සපයා ඇති අතර, එය ජාත්‍යන්තර මට්ටමින් පිළිගැනීමට ලක්ව ඇත. ආචාර්ය නදීශා චන්ද්‍රසේන මහත්මිය ඇගේ පර්යේෂණ කටයුතු සම්බන්ධයෙන් වැඩිදුර අදහස් දක්වමින්, මෙම තාක්ෂණික විසඳුම් නගර ජලාශ්‍රිත පද්ධතිවල කාර්යක්ෂමතාව වැඩිදියුණු කිරීමට හා පාරිසරික දූෂණය අවම කිරීමට උපකාරී වන බව පෙන්වා දුන්නාය. ඇයගේ මෙම ජයග්‍රහණය ශ්‍රී ලංකාවේ විද්‍යා හා තාක්ෂණ ක්ෂේත්‍රයේ දියුණුවට මහත් ප්‍රබෝධයක් ඇති කරනු ඇතැයි බලාපොරොත්තු වේ. මෙම සම්මාන උළෙල ජාත්‍යන්තර තලයේ නව්‍යතාවය හා නිර්මාණශීලිත්වය පිළිගන්නා වැදගත් අවස්ථාවක් වන අතර, ආචාර්ය නදීශාගේ ජයග්‍රහණය මෙරටට ගෞරවයක් ගෙන දී ඇත.