චීන - ජපන් රාජ්ය තාන්ත්‍රික මතගැටුම් උග්‍ර වෙයි
පසුගිය දිනවල තායිවානය පිළිබඳව ජපාන අග්‍රාමාත්‍යවරිය විසින් කරන ලද ප්‍රකාශයක් හේතුවෙන් චීනය සහ ජපානය අතර ඇතිව තිබූ දේශපාලනික ආතතීන් තවදුරටත් වර්ධනය වී ඇත. මෙම ආතතීන්හි මූලික හේතුව වී ඇත්තේ ජපානයේ අග්‍රාමාත්‍ය සානේ ටකයිචි මහතා විසින් මීට පෙරදා කරන ලද ප්‍රකාශයකි. ඔහු පවසා සිටියේ චීනය විසින් තායිවානයට යම් ආකාරයක ආක්‍රමණයක් එල්ල කළහොත්, ජපානය එයට තම හමුදා බලය භාවිතයෙන් ප්‍රතිචාර දක්වන බවයි. මෙම අර්ථ දැක්වීම තායිවානය සම්බන්ධයෙන් චීනය දරන ‘එක් චීනයක්’ ප්‍රතිපත්තියට සෘජුවම ප්‍රතිවිරුද්ධ වන අතර අන්තර්ජාතික සම්බන්ධතාවලදී ඉතා බරපතල තර්ජනයක් ලෙස සැලකේ. මෙම තත්ත්වය හමුවේ දෙරට අතර ඇතිකරගත් රාජ්ය තාන්ත්‍රික සාකච්ඡා අසාර්ථක වී ඇත. චීනයේ අගනුවර වන බෙයිජිංහිදී පැවති මෙම සාකච්ඡාවලදී පැහැදිලිවම කිසිදු එකඟතාවයක් ඇති කර ගත නොහැකි විය. එහි ප්‍රතිඵලයක් ලෙස, මෙම ආරවුල දේශපාලනික මට්ටමින් පමණක් නොනවතා ආර්ථික සම්බන්ධතාවලට ද බලපෑම් එල්ල කර තිබේ. දැනටමත් චීනය විසින් ජපානයේ සිට මත්ස්‍ය ආහාර නිෂ්පාදන ආනයනය කිරීම සම්පූර්ණයෙන්ම නවතා දමා ඇත. මෙය ජපානයේ මත්ස්‍ය කර්මාන්තයට සහ ආර්ථිකයට සෘජුවම බලපාන තීරණයක් වන අතර චීනයේ විරෝධතාවය ප්‍රකාශ කිරීමේ තවත් ක්‍රමවේදයක් ලෙස සැලකිය හැකිය. මීට අමතරව, මෙම කලාපීය ආතතීන් තවත් ගැඹුරු කිරීමට ඇමෙරිකාව විසින් ගත් තීරණයක් පිළිබඳවද වාර්තා වේ. එනම්, ඇමෙරිකානු ඩොලර් මිලියන 700 කට ආසන්න මුදලක් වැය කරමින් තායිවානයට ගුවන් ආරක්ෂණ පද්ධති ලබා දීමට ඇමෙරිකාව තීරණය කර ඇති බවයි. මෙම පියවර චීනය විසින් තායිවානය පිළිබඳව දරන අභියෝගයට ඇමෙරිකාව සහ ජපානය එක්ව ප්‍රතිචාර දක්වන බවටම සලකනු ලබයි. එබැවින්, තායිවානය යනු චීනයේ අඛණ්ඩ ප්‍රදේශයක් යන චීන රජයේ මූලික අභිප්‍රායට ප්‍රතිවිරුද්ධව ජපානය සහ ඇමෙරිකාව විසින් ගෙන යන මෙම පියවර අනාගතයේ දී මෙම කලාපයේ සාමය හා ස්ථාවරත්වයට තවදුරටත් තර්ජනයක් විය හැකිය.
News Sources
