පසුගිය පෙබරවාරි වැනිදා සිදුවූ දීපව්යාප්ත විදුලිය බිඳවැටීම සම්බන්ධයෙන් ප්රසිද්ධ විභාගයක් පැවැත්වීමට මහජන උපයෝගිතා කොමිසම තීරණය කරයි

මහජන උපයෝගිතා කොමිසම විසින් පසුගිය පෙබරවාරි 09 වන දින ලංකා විදුලිබල මණ්ඩලයේ පානදුර ග්‍රිඩ් උපපොළේ සිදුවූ විදුලි බිඳවැටීම පිළිබඳව ප්‍රසිද්ධ විභාගයක් අද (05) පෙරවරු 8.30 සිට පස්වරු 6.00 දක්වා කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී පැවැත්වේ. මෙම විභාගය සංවිධානය කරනු ලබන්නේ පානදුර ග්‍රිඩ් උපපොළේ සම්ප්‍රේෂණ පද්ධතියට වඳුරෙකු ගැටීම හේතුවෙන් සිදුවූ හදිසි විදුලි බිඳවැටීම නිසා ඇතිවූ බලපෑම් සහ පාඩු පිළිබඳව සූක්ෂමව විමර්ශනය කිරීම සඳහාය. මෙම සිදුවීම නිසා සම්ප්‍රේෂණ බලපත්‍රලාභියාට ගිගාවොට් පැය 5.5 ක බලශක්ති ඉල්ලුමක් සැපයීමට නොහැකි වූ අතර, පසුව සිදුකළ විදුලි කප්පාදු හේතුවෙන් ගිගාවොට් පැය 4.6 ක බලශක්ති ඉල්ලුමක්ද සැපයීමට නොහැකි විය. මෙම බිඳවැටීම නිසා බෙදාහැරීමේ බලපත්‍රලාභීන්ට සිදුවූ පාඩු, ජනතාවට, ආර්ථිකයට සහ පාරිභෝගිකයින්ට ඇතිවූ අන්තරායන් සහ බලපෑම් මහජන උපයෝගිතා කොමිසම විසින් විශේෂයෙන් සඳහන් කර ඇත. මෙම විභාගයේ ප්‍රධාන අරමුණ වන්නේ විදුලි බිඳවැටීම නිසා සිදුවූ සමාජ ආර්ථික බලපෑම් පිළිබඳව සොයාබැලීමත්, අනාගතයේදී මෙවැනි අනතුරු වළක්වා ගැනීම සඳහා යෝග්‍ය පියවර ගැනීමත්ය. ලංකා විදුලිබල මණ්ඩලයේ වැඩබලන සාමාන්‍යාධිකාරී ප්‍රමුඛ ජ්‍යෙෂ්ඨ නිලධාරීන් මෙම විභාගය සඳහා පෙරවරුවේ ප්‍රකාශ ලබා දුන්හ. පෙබරවාරි 09 වන දින සිදුවූ මෙම සිද්ධිය පිළිබඳව බලශක්ති අමාත්‍ය ඉංජිනේරු කුමාර ජයකොඩි මහතා ප්‍රකාශ කළේ සම්ප්‍රේෂණ පද්ධතියට වඳුරෙකු ගැටීම නිසා බිඳවැටීම සිදුවූ බවයි. කෙසේවෙතත්, විදුලිබල මණ්ඩලයේ මුල් වාර්තා පිළිබඳව සෑහීමකට පත් නොවූ මහජන උපයෝගිතා කොමිසම මෙම විමර්ශනය පැවැත්වීමට තීරණය කර ඇත. වැඩිදුර තොරතුරු සඳහා 077-2943193 අංකය ඇමතීමෙන් ලබා ගත හැකිය. මෙම විභාගයේ තීරණ මගින් අනාගත විදුලි බිඳවැටීම් වලක්වා ගැනීමට අවශ්‍ය පියවර ගැනීමට මඟ පෑදීමට බලාපොරොත්තු වේ.