කුමන්ත්‍රණයකින් ආණ්ඩුව පෙරළීමට උත්සාහ ගැනීමේ චෝදනාවට බ්‍රසීලයේ හිටපු ජනාධිපති "ජෙයාර් බොල්සොනාරෝ" ගේ වසර 27ක සිර දඬුවම ඇරඹේ..

බ්‍රසීලයේ හිටපු ජනාධිපති ජෙයාර් බොල්සොනාරෝට වසර 27ක සිර දඩුවම නියම කරමින් එරට ශ්‍රේෂ්ඨාධිකරණය ඊයේ (පෙබරවාරි 25) ඓතිහාසික තීන්දුවක් නිකුත් කළේය. මෙම නියෝගය ලබා දුන්නේ, බොල්සොනාරෝ විසින් ඉදිරිපත් කර තිබූ සියලුම නීතිමය අභියාචනා සහ පැමිණිලි ප්‍රතික්ෂේප වීමත් සමඟයි. එම නිසා ඔහුගේ සිර දඩුවම වහාම ආරම්භ කළ යුතු බවත් අගනුවර පොලිස් මුලස්ථානයේ රඳවා සිටින ඔහු එම ස්ථානයේදීම දඬුවම ලබා ගත යුතු බවත් ආණ්ඩුක්‍රම ව්‍යවස්ථාධිකරණය නියම කළේය. බොල්සොනාරෝ 2019 සිට 2022 දක්වා බ්‍රසීලයේ 38 වැනි ජනාධිපතිවරයා ලෙස සේවය කළේය. ඔහුගේ දඬුවමට හේතු වූයේ 2022 වර්ෂයේදී ඔහුගේ අනුගාමිකයින් කැදවාගෙන ජනාධිපතිවරණ ප්‍රතිඵල ප්‍රතික්ෂේප කරමින් සහ වත්මන් ජනාධිපති ලූලා ද සිල්වා ධුරයට පත්වීමට එරෙහිව කුමන්ත්‍රණයක් දියත් කිරීමට උත්සාහ කිරීමේ චෝදනාවලට ලක්වීමයි. මෙම කුමන්ත්‍රණය රජය පෙරළීමකට යොමු කිරීමේ අරමුණක් ඇති බවට චෝදනා එල්ල විය. මෙම චෝදනා සම්බන්ධයෙන් දීර්ඝ නඩු විභාගයකින් පසුව ඔහුට මෙම සිර දඬුවම නියම විය. නඩුවේ අභියාචනා සලකා බලන තෙක් දින 100කට වැඩි කාලයක් ඔහු නිවාස අඩස්සියේ රඳවා සිටියේය. කෙසේවෙතත්, පසුගිය සෙනසුරාදා ඔහු හදිසියේම අත්අඩංගුවට ගන්නා ලද්දේ නිවාස අඩස්සියෙන් පලා යාමේ උත්සාහයක දී යැයි සැක කරන තත්ත්වයක් හේතුවෙනි. වාර්තා වන්නේ ඔහු සිය වලලුකරයේ පැලඳ සිටි නිරීක්ෂණ මොනිටරය ගලවා දැමීමට ද උත්සාහ කර ඇති බවයි. පසුව ඔහු පවසා ඇත්තේ තමන් ගත් ඖෂධයකින් ඇති වූ "තාවකාලික මානසික ව්‍යකූලත්වයක්" හේතුවෙන් එම මොනිටරය ගලවා දැමීමට තර්ජනයක් ඇති වූ බවයි. මේ වන විට ඔහු බ්‍රසීලියා අගනුවර පොලිස් මුලස්ථානයේ රඳවා සිටින අතර, ශ්‍රේෂ්ඨාධිකරණ තීන්දුවට අනුව ඔහුගේ වසර 27ක සිර දඬුවම එහිදීම ආරම්භ වේ. පසුව ඔහුව නිත්‍ය බන්ධනාගාරයකට මාරු කිරීමට නියමිතය.