මෙරට පාර්ලිමේන්තු නියෝජිත පිරිසක් හා ඉන්දීය කතා නායක අතර හමුවක්

ශ්‍රී ලංකාවේ පාර්ලිමේන්තු නියෝජිත පිරිසක් සහ ඉන්දීය ලෝක් සභාවේ කථානායක ඕම් බිර්ලා මහතා අතර වැදගත් හමුවක් ඉන්දියාවේ පැවති බව සෞඛ්‍ය හා ජනමාධ්‍ය අමාත්‍යාංශය වාර්තා කරයි. මෙම හමුව පැවතියේ ඉන්දීය පාර්ලිමේන්තු කථානායක කාර්යාලයේදී ය. ශ්‍රී ලංකාවේ ඉන්දීය මහ කොමසාරිස් කාර්යාලයේ ආරාධනයක් මත, සෞඛ්‍ය හා ජනමාධ්‍ය අමාත්‍ය, ආණ්ඩු පාර්ශ්වයේ ප්‍රධාන සංවිධායක සහ ශ්‍රී ලංකා-ඉන්දියානු පාර්ලිමේන්තු මිත්‍රත්ව සංගමයේ සභාපති වෛද්‍ය නලින්ද ජයතිස්ස මහතාගේ නායකත්වයෙන් යුත් පිරිස මෙම නිල සංචාරය සිදු කරන ලදී. හමුවේදී, ඉන්දීය ලෝක් සභාවේ කථානායකවරයා අවධාරණය කර ඇත්තේ මෙවැනි සංචාර මගින් ඉන්දියාව සහ ශ්‍රී ලංකාව අතර ද්විපාර්ශ්වික සබඳතා, විශේෂයෙන්ම පාර්ලිමේන්තු සහයෝගීතාව, සෞඛ්‍ය, මාධ්‍ය සහ අධ්‍යාපනය වැනි ක්ෂේත්‍රවල දී තවදුරටත් ශක්තිමත් වනු ඇති බවයි. සාකච්ඡාවලදී ලෝක් සභාව සහ රාජ්‍ය සභාව සමඟ සම්බන්ධ වී කටයුතු කිරීමේ ක්‍රම, සභා ගර්භ සහ පාර්ලිමේන්තු පුස්තකාලය නිරීක්ෂණය, ඉන්දියානු මාධ්‍යයේ කාර්යභාරය, පාර්ලිමේන්තු කාරක සභා පද්ධතිය, උසස් අධ්‍යාපනය, මහජන සෞඛ්‍ය, පාර්ලිමේන්තු වරප්‍රසාද සහ ආචාර ධර්ම වැනි ප්‍රධාන තේමා ගණනාවක් පිළිබඳව දීර්ඝ සාකච්ඡාවක් ඇති විය. මෙම සංචාරයේදී පාර්ලිමේන්තු නියෝජිත පිරිස සෞඛ්‍ය විශිෂ්ටතා මධ්‍යස්ථානය (Centre for Excellence in Health) නිරීක්ෂණය කිරීමටද අවස්ථාව ලැබුණු අතර, ඉන්දියානු වාණිජ හා කර්මාන්ත මණ්ඩල සම්මේලනයේ (FICCI) ජ්‍යෙෂ්ඨ නිලධාරීන් සමග සාකච්ඡා පැවැත්වීම ඇතුළු වැඩසටහන් ගණනාවකින්ද සහභාගී විය. මෙම සියලු ක්‍රියාකාරකම් මගින් දෙරට අතර පවතින සහයෝගීතාවය ගැඹුරු කිරීම සහ නව අවස්ථා සොයා ගැනීම අරමුණු විය. මෙම එක්වීම් ද්විපාර්ශ්වික සම්බන්ධතා ශක්තිමත් කිරීම සඳහා පාර්ලිමේන්තු මට්ටමින් සිදු වන අඛණ්ඩ ප්‍රයත්නවලට උදාහරණයක් ලෙස දැක්විය හැකිය.