කහවත්තේ තරුණයෙකු ඝාතනය ගැන තවත් තොරතුරු

කහවත්ත ඇන්දාන ප්‍රදේශයේදී පොලීසිය ලෙස පෙනී සිටි කණ්ඩායමක් විසින් තරුණයින් දෙදෙනෙකු පැහැරගෙන ගොස් එක් තරුණයෙකු වෙඩිතබා ඝාතනය කර ඇත. අනෙක් තරුණයා වෙඩි වැදීමෙන් තුවාල ලැබී රෝහල්ගත කර ඇත. මෙම සිදුවීම 2023 මැයි 30 වන දින රාත්‍රියේ කහවත්ත, බුංගිරිය, පලන්සූරියගම ප්‍රදේශයේ සිදුවිය. පොලීසියට අනුව, මත්ද්‍රව්‍ය ජාවාරමක් සම්බන්ධව තොරතුරු ලබාදීම හේතුවෙන් මෙම ඝාතනය සිදුවී ඇත. සිදුවීමේදී, සහෝදරයන් දෙදෙනෙකු සහ තවත් තරුණයෙකු සමඟ කතාබහ කරමින් සිටියදී, පොලීසිය ලෙස පෙනී සිටි පිරිසක් "දුවන්න එපා. අපි රත්නපුර පොලීසියෙන්. ඔහොම ඉඳපල්ලා" යනුවෙන් ඔවුන්ට අණ කර ඇත. එම අවස්ථාවේදී සහෝදරයන් දෙදෙනා අතරින් එක් අයෙක් පලාගොස් අසල තේවත්තක සැඟවී ඇත. පසුව තවත් පිරිසක් පැමිණ ඉතිරි තරුණයින් දෙදෙනා මාංචුවකින් බැඳ ජීප් රථයක නංවාගෙන ගොස් කහවත්ත ඇන්දාන, කොස්කෑල්ල ප්‍රදේශයේ පාළු ස්ථානයක බිම දණගස්වා ඇත. එහිදී තරුණයින් කෑගසන විට, පැහැරගත් කණ්ඩායමේ අයෙකු වෙඩි තබා ඇති අතර, එක් තරුණයෙකුගේ පාදයට උණ්ඩ කැබැල්ලක් වැදී ඇත. අනෙක් තරුණයා "මේ පොලිසියෙන් නෙවෙයි, අපිව මරන්නයි යන්නේ" යැයි කෑගසා ඇති අතර, එම පිරිස ඔහුගේ ගෙලට වෙඩි තබා ජීප් රථයෙන් පලාගොස් ඇත. ප්‍රදේශවාසීන්ගේ මැදිහත්වීමෙන් තුවාල ලැබූ තරුණයා රෝහල්ගත කර ඇති අතර, ගෙලට වෙඩි තබා ඇති 22 හැවිරිදි ඉමන්ත සුරංජන් නම් තරුණයා මියගොස් ඇත. පොලීසියේ විමර්ශනවලින් හෙළිවී ඇත්තේ, මෙම ඝාතනයට ලක්වූ තරුණයා සහ ඔහුගේ සහෝදරයා ඔවුන්ගේ ප්‍රදේශයේ පුද්ගලයෙකු සමඟ 2023 අප්‍රේල් මාසයේදී ගැටුමක් ඇතිකරගෙන ඇති බවයි. මෙම ගැටුමට හේතුව එම පුද්ගලයා සිදුකරන ගංජා සහ අයිස් මත්ද්‍රව්‍ය ජාවාරමට සහෝදරයින් විරෝධය පළකිරීමයි. එම පුද්ගලයා ඩුබායිහි සැඟවී සිටින මත්ද්‍රව්‍ය ජාවාරම්කරුවකු වන අමිත් නම් අයගේ ඥාතියෙකු වන බැවින්, මෙම ඝාතනය මත්ද්‍රව්‍ය ජාවාරම හා සම්බන්ධ බව පොලීසිය සැක කරයි.