චීනයට ගිය ටිල්වින් විශේෂ හමුවක

ජනතා විමුක්ති පෙරමුණේ (ජවිපෙ) ප්‍රධාන ලේකම් ටිල්වින් සිල්වා මහතා ඇතුළු පක්ෂ නියෝජිත පිරිසක් දැනට චීනයේ සංචාරයක නිරත වී සිටී. චීන කොමියුනිස්ට් පක්ෂයේ (චීන කොමුපා) ආරාධනය මත සිදුවන මෙම සංචාරයට නියෝජ්‍ය ඇමති එරංග ගුණසේකර සහ පාර්ලිමේන්තු මන්ත්‍රීවරුන්ගේ පිරිසක්ද සහභාගී වී ඇත. සංචාරයේ පළමු අදියර ලෙස ඊයේ ජජියාන් පළාතේ ආණ්ඩුකාර ලියු ජියේ මහතා සමඟ ටිල්වින් සිල්වා මහතා සාකච්ඡා කළ අතර, එහිදී ශ්‍රී ලංකා-චීන ද්විපාර්ශ්වික සබඳතා සහ ජවිපෙ-චීන කොමුපා අතර ඓතිහාසික මිත්‍රත්වය පිළිබඳව විස්තරාත්මක සාකච්ඡා පැවැත්විණි. ටිල්වින් සිල්වා මහතා මෙම අවස්ථාවේදී ශ්‍රී ලංකාවේ පසුගිය දූෂිත පාලනය අවසන් කර ජාතික ජන බලවේග ආණ්ඩුව (ජජබා) පිහිටුවා ඇති බව සහ එම ආණ්ඩුව රටේ ආර්ථිකය වේගවත්ව සංවර්ධනය කිරීම සඳහා සැලසුම් සහිතව කටයුතු කරන බව අවධාරණය කළේය. එමෙන්ම, චීනයේ ජජියාන් පළාතේ සහයෝගීතාව මෙන්ම චීන කොමියුනිස්ට් පක්ෂයේ අත්දැකීම් වලින් ඉගෙනීමට ජවිපෙ බලාපොරොත්තු වන බව ඔහු සඳහන් කර ඇත. මෙම සංචාරය ශ්‍රී ලංකාව සහ චීනය අතර දේශපාලන, ආර්ථික සහ සංස්කෘතික සබඳතා තවදුරටත් ශක්තිමත් කිරීමට උපකාරී වනු ඇතැයි බලාපොරොත්තු වේ. මෙම සංචාරය චීනයේ විවිධ ප්‍රාන්ත නායකයින් සහ පක්ෂ නිලධාරීන් සමඟ සාකච්ඡා මාලාවකට මග පාදනු ඇති අතර, විශේෂයෙන් ආර්ථික සහයෝගීතාව, ආයෝජන අවස්ථා සහ දේශපාලන සහයෝගීතාව පිළිබඳව වැඩිදුර සාකච්ඡා සිදුවේ. ජවිපෙ නියෝජිත පිරිස මෙම ගමනින් ලබා ගන්නා අත්දැකීම් ශ්‍රී ලංකාවේ ජනතාවගේ ජීවන මට්ටම ඉහළ නැංවීම සඳහා යොදා ගැනීමට බලාපොරොත්තු වන බවට පක්ෂය ප්‍රකාශ කර ඇත.