'තෙබුවන බිංදු' ලක්ෂ 50ක අයිස් මත්ද්‍රව්‍ය සමඟ අත්අඩංගුවට

තෙබුවන පොලීසිය විසින් 'තෙබුවන බිංදු' නැමැති පුද්ගලයා අත්අඩංගුවට ගෙන ඇත. ඔහු ඊසි කෑෂ් ක්‍රමය භාවිතා කරමින් තෙබුවන, හොරණ, මතුගම සහ අඟුරුවාතොට ප්‍රදේශ ඉලක්ක කර ගනිමින් අයිස් මත්ද්‍රව්‍ය ජාවාරමක් පවත්වාගෙන ගිය බව සොයාගෙන ඇත. මෙම ජාවාරම ඉතා සූක්ෂම ලෙස සිදුකර ඇති අතර, පොලීසියට ලැබුණු තොරතුරක් මත වැටලීම සිදුවිය. තෙබුවන පොලීසියේ ස්ථානාධිපති ප්‍රධාන පොලිස් පරීක්ෂක සේනාධිරගේ දර්ශන මහතාගේ උපදෙස් පරිදි විශේෂ පොලිස් කණ්ඩායමක් මෙම ක්‍රියාවලියට සම්බන්ධ විය. සැකකරුවා දෙල්ගොඩ පන්සල අසලදී අයිස් ග්‍රෑම් 15ක් සමග අත්අඩංගුවට ගන්නා ලදී. පසුව මතුගම මහෙස්ත්‍රාත් අධිකරණයට කරුණු වාර්තා කර ඇති අතර, මහෙස්ත්‍රාත්වරයාගේ උපදෙස් මත ඔහුව දින හතක් රඳවා තබා ප්‍රශ්න කිරීමට අවසර ලබා දී ඇත. වැඩිදුර විමර්ශනයේදී, තෙබුවන සහ කිරිමැටිය ප්‍රදේශයේ පාලු නිවසක පඩි පෙළක් අසල ග්‍රෑම් 310ක අයිස් මත්ද්‍රව්‍ය තොගයක් සොයාගෙන ඇත. මෙම තොගය ලක්ෂ පනහකට ආසන්න වටිනාකමකින් යුක්ත බව පැවසේ. ඊට අමතරව, සැකකරුගේ මිල්ලනිය ලබුගම ප්‍රදේශයේ නිවස පරීක්ෂා කිරීමේදී, අයිස් මැනීමට භාවිතා කරන ඩිජිටල් තරාදියක්, ඇසුරුම් කිරීම සඳහා ඉටිකොළ සහ විවිධ පුද්ගලයින්ගේ නම්වලින් ලියාපදිංචි වූ බැංකු ගිණුම් පත් සොයාගෙන ඇත. ජාවාරම සඳහා භාවිතා කළ ජංගම දුරකථන 10ක් සහ ඒ සඳහා භාවිතා කළ සිම්පත් ද පොලිසිය අත්පත් කරගෙන ඇත. බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න මහතාගේ උපදෙස් පරිදි මෙම ජාවාරමේ මූලාශ්‍ර සහ අනෙකුත් සම්බන්ධතා පිළිබඳ වැඩිදුර විමර්ශන ක්‍රියාත්මක වෙමින් පවතී. සැකකරුවා කළුතර මහෙස්ත්‍රාත් අධිකරණයට ඉදිරිපත් කිරීමට නියමිතය.