මහනුවර ඓතිහාසික ඇසළ පෙරහැර මංගල්‍යයට දින නියම කෙරේ

2025 කන්ද උඩරට ඓතිහාසික ඇසළ පෙරහැර මහා මංගල්‍යය සඳහා දින නියම කර ඇත. මහනුවර ශ්‍රී දළදා මාලිගාවේ රන් ආවුද මණ්ඩපයේ පැවති සාකච්ඡාවකදී දියවඩන නිලමේ ප්‍රදීප් නිලංග දෑල මහතා ප්‍රකාශ කළේ, සතර මහා දේවාලයන්හි සුබ නැකතට අනුව ජුලි 25 වන දින කප් සිටුවීමෙන් ඇසළ පෙරහැර මංගල්‍යය ආරම්භ වන බවය. දේවාල අභ්‍යන්තර පෙරහැර දින පහක් පැවැත්වීමෙන් පසු, ප්‍රථම කුඹල් පෙරහැර ජුලි 30 වන දින වීදී සංචාරය කෙරෙනු ඇත. කුඹල් පෙරහැර ජුලි 30 සිට අගෝස්තු 03 දක්වා පැවැත්වෙන අතර, අගෝස්තු 04 වන දින ප්‍රථම රන්දෝලි පෙරහැර වීදී සංචාරය කරනු ඇත. අවසන් රන්දෝලි මහ පෙරහැර නිකිණි පුන් පොහොය දිනයේ (අගෝස්තු 08) රාත්‍රියේ වීදී සංචාරය කිරීමට සැලසුම් කර ඇත. මෙම සාකච්ඡාවේදී, දියවඩන නිලමේ සහ සිව් මහා දේවාල බස්නායක නිලමේවරුන් අවධාරණය කළේ, හීලෑ අලි ඇතුන්ගේ සංඛ්‍යාව අඩුවීම පෙරහැර පැවැත්වීමට මහත් බාධකයක් බවයි. වසර කිහිපයකට පෙර 200ක් පමණ වූ හීලෑ අලි ඇතුන්ගේ සංඛ්‍යාව දැන් 90ක් දක්වා අඩුවී ඇති බව ඔවුන් අනාවරණය කළහ. මෙම තත්ත්වය පෙරහැර සංවිධානය කිරීමේදී ඇතිවන අභියෝග ගැන වැඩි අවධානයක් යොමු කරන ලදී.