ශ්‍රීපාද වන්දනා සමයෙන් වනජීවි දෙපාර්තමේන්තුවට කෝටි ගණනක ආදායමක්
ශ්‍රීපාද වන්දනා සමය ආරම්භයත් සමඟම, නල්ලතන්නිය පිහිටි ශ්‍රීපාද මාර්ගයේ වනජීවි කලාපය තුළ වෙළඳසල් 06ක් සහ වැසිකිලි 05ක් මාස හයක කාලයක් පවත්වාගෙන යාම සඳහා ටෙන්ඩර් පත් කැඳවීමෙන් වනජීවි දෙපාර්තමේන්තුවට රුපියල් කෝටි දෙක හැත්තෑ පන්ලක්ෂයක් (රු. මිලියන 27.5) ආදායමක් උපයා ගැනීමට හැකි වී ඇත. මෙම තොරතුරු හෙළිකර ඇත්තේ නල්ලතන්නි වනජීවි කාර්යාලයේ වන අඩවි ආරක්ෂක නිලධාරී ආර්.එම්.ටී.බී. රත්නායක විසිනි. ඔහු පෙන්වා දුන්නේ සෑම වසරකම පවත්වනු ලබන මෙම ටෙන්ඩර් ක්‍රියාවලියට, මෙවර වසර කිහිපයකට සාපේක්ෂව විශාල ඉල්ලූමක් ඇති වී තීව්‍ර තරඟයක් ඇති වූ බවයි. මෙම ව්‍යාපාරික කටයුතු පාලනය කිරීම සඳහා වනජීවි දෙපාර්තමේන්තුව විසින් ඉතා දැඩි පාරිසරික ආරක්ෂණ කොන්දේසි සහ නීති රීති මාලාවක් පනවා ඇත. ඒ අනුව, සෑම වෙළඳසලකටම අවශ්‍ය ආහාර ද්‍රව්‍ය සහ අනෙකුත් අමුද්‍රව්‍ය රක්ෂිතයෙන් පිටතින් රැගෙන ඒමට සිදු වන අතර, රක්ෂිතය තුළින් ගස් කපා ගැනීම හෝ අතු කැපීම සම්පූර්ණයෙන්ම තහනම් කර ඇත. ජලය අලෙවි කිරීමේදී, ලීටරයකට වැඩි ධාරිතාවයක් ඇති වතුර බෝතල් පමණක් විකිණීමට අවසර ඇති අතර, ලීටර් භාගයේ බෝතල් හෝ පැණි බීම බෝතල් අලෙවි කිරීම තහනම් වේ. අපද්‍රව්‍ය කළමනාකරණය සම්බන්ධයෙන්, වෙළඳසල් විසින් ජනනය කරන ප්ලාස්ටික්, පොලිතින් සහ අනෙකුත් දිරා නොයන ඝන අපද්‍රව්‍ය පරිසරයට මුදා නොහැරිය යුතු බවට දැඩි නියෝග ලබා දී ඇත. විශේෂයෙන්ම, සීතගගුලේ සිට ඉදිකටු පහන දක්වා විහිදෙන ප්‍රදේශයේ වන්දනාකරුවන්ට නොමිලේ ලබා දෙනු ලබන පානීය ජල සැපයුමට කිසිදු ආකාරයේ හානියක් සිදු නොකරන ලෙසට ව්‍යාපාරිකයන්ට උපදෙස් ලබා දී ඇත. මෙම කොන්දේසි උල්ලංඝනය කිරීම හෝ උපදෙස් අවහිර කිරීම සිදු වුවහොත්, අදාළ වෙළඳසල්වලට ලබා දී ඇති තාවකාලික ටෙන්ඩර් බලපත්‍රය අවලංගු කරන බවට ද අනතුරු ඇඟවී ඇත. මෙම සියලුම නියමයන් හා කොන්දේසි ශ්‍රීපාද වන්දනා සමය අවසන් වන තෙක් නිසි ලෙස පිළිපදින බවට අධීක්ෂණය කිරීම සඳහා නල්ලතන්නි වනජීවි කාර්යාලයේ නිලධාරීන්, පොලිස් නිලධාරීන්, මස්කෙලිය ප්‍රාදේශීය සභා නිලධාරීන් සහ මහජන සෞඛ්‍ය පරික්ෂකවරුන්ගේ සමීක්ෂණ කණ්ඩායම් ක්‍රියාත්මක වන බවත් රත්නායක මහතා වැඩිදුරටත් පැහැදිලි කළේය. මෙම සමස්ථ ක්‍රියාවලියෙන් අරමුණු වී ඇත්තේ වන්දනාකරුවන්ට අවශ්‍ය සේවා සැපයීමත් සමඟම, ශ්‍රීපාදයේ පවතින සංවේදී පාරිසරික පද්ධතිය සහ ජල මූලාශ්‍ර ආරක්ෂා කර ගැනීමයි.
News Sources
